Kris Kelvin e as pantasmas de neutrinos
20 January 2007
Onte fum ver Solyaris ao CGAC, bem acompanhado por Modesto e Ifrit. Lembro de ler a novela na adolescencia, num vrao abafante no deserto castelhano. Lem pode ser agradável, nas suas novelas cómicas, ou filosóficamente esfogante, e unido aos planos eternos de Tarkovsky criam um filme "pouco amável" para o espectador, mais como diciam alguem... nom sempre tés que passa-lo bem no cine.
De aquí em diante há um pequeno/grande spoiler sobre o filme, se nom queredes ler...
Nom lembro muito da novela original, pero já está na minha listagem de "pendentes". O que nom lembro é se Lem empregava a explicaçom de que os entes criados polo mar de Solyaris eram "agrupaçons de neutrinos, estabilizados polo campo magnético do planeta". Desde o ponto de vista científico isto é umha barbaride coma um mundo. Conste que ao vêr a película desliguei os neuronios que controlam os meus conhecimentos de Física, que se nom a experiência seria mais dura... Porém sinto-me obrigado a explicar um pouco o tema dos neutrinos, tentando nom sair do nivel de "divulgaçom". Criticade-me se vedes que me passo muito.
Antes de falar dos neutrinos temos que ter claro como funciona a investigaçom de partículas subatómicas. Vai uns dias escrevia sobre o último fraude da modalidade "móbil eterno" presentado em Compostela, e arguia que de primeiras o aparelho de Omar Fall chocava contra a mais básica das leis da Física: A conservaçom da energia, e em geral as leis de conservaçom. Na Ciência as leis de conservaçom e simetria som epistemológicamente "superiores", a carga da prova necesaria para falsa-los tem que ser mui grande, e se umha experiência parece contraria-las a praxe obriga a considerar primeiro todas as opçons antes de afirmar a falsaçom. Quando no aceleradores de partículas estas colidem midem-se as propriedades das resultantes, e se estas nom sumam o mesmos que as originais postula-se a existência de novas partículas que fagam quadrar o cálculo. Depois desenha-se um novo experimento para detectar a partícula postulada.
Bom, pois isso foi o que passou em 1930 quando os científicos estudarom a desintegraçom β dum neutrom. A desintregraçom β acontece quando umha partícula atómica desintégrase em outra diferente, emitindo um electrom. Um neutrom é umha partícula atómica, de massa finita e carga neutra, descompom-se num protom (carga positiva e com massa finíta) e um electrom (carga negativa e massa muito mais pequena que as outras duas. Mais quando os cientistas de começos de século calcularom as energias resultantes atoparom um problema: Faltava energia e momento angular. Wolfgang Pauli pronosticou umha nova partícula que quadrara: O neutrino, umha partícula sem massa, sem carga e sem quase interaçom coa materia normal... umha partícula pantasma.
Segundo os cálculos de Pauli o neutrino seria umha partícula tam escorregadiza que os aparelhos da década dos 30 nom tinham capacidade para atopa-la de forma independente. O "problema do neutrino" ficou sem soluçom até que a equipa de Cowan e Reines desenharom um experimento e medirom o neutrino isolado em 1956... um quarto de século depois de que Pauli pronosticara a sua existência. A Física pode tomar-se muito tempo.
A dificultade na mediçom do neutrino radica na sua natureza "pantasmal" (falando de jeito poético): Teoricamente nom tem massa, assim que nom lhe afeita a gravidade, nom tem carga electrica, assim que o magnetismo para ela nom existe, também adoita escapulir-se das outras forças do universo... Para ter umha ideia, se queremos estar seguros ao 50% de que um neutrino colide coa materia ordinária teriamos que faze-lo passar por um ano-luz de chumbo: 9.460.730.472.580,8 km... e isso é muito chumbo. Por sorte todo isto é questom de estatística, e se chegam milhons de neutrinos até a Terra algum tem que interagir, assim que os aparelhos empregados baseam-se em grandes volumenes detectores polos que passam milhons de neutrinos em cada instante, e mau será que algum nom faga "ping!".
Todo o anterior deita por terra a explicaçom do filme sobre a natureza das criaçons do mar de Solyaris. Os neutrinos nom formam átomos, e nom podem interagir quase coa materia "normal", e nom importa os "campos magnéticos do planeta", pois eles som imunes a essa força. Assim que por muito control que tenha o mar de Solyaris sobre o magnetismo, ou a gravidade do seu planeta (sabe Lem como caralho fai isso) nom pode afeitar aos neutrinos. E estes nunca teram as propriedades da materia normal, o que inclue quentar a cama dos astronautas...
Bom se algum leitor ficou até aquí... beiçons! Como maximo seredes dous ou três. Vou baixar um pouco o nível e contar algumha anedota sobre os neutrinos. Por exemplo, a origem do seu nome. O descubrimento dos neutrinos está ligado aos neutrons, embora existem dous tipos ( "sabores" ) mais de neutrinos ligados a outras partículas, e todos recevem o mesmo nome. A razom está num jogo de palavras obra do físico que lhes deu nome, Enrico Fermi. Ele foi dos primeiros em trabalhar, de jeito matemático e teórico, coa partícula descrita por Pauli assim que procurou um nome para ela. Como a palavra italiana para neutrom era "neutrone" o semelhava que incluia o sufixo -one (grande em italiano) Enrico jogou coa paranomasia e chamounos "neutrinos" (-ino, pequerrecho). a cousa é que "one" nessa palavra nom é umha partícula constitutiva, assim que é umha falsa etimologia. O nome era entom umha brincadeira do físico romano e nunca pensou que o nome calharia entre os outros cientistas porem os seguintes trabalhos basearom-se nos cálculos de Fermi e a palavra transmitiu-se, primeio a brincar e logo como um consenso)... E já temos neutrinos... ou netrinhos, seguindo jogo de Fermi.
Umha última curiosidade sobre os neutrinos: Durante quase 30 anos um problema no número de neutrinos detectados desde o sol deu dores de cabeça aos astrofísicos, os físicos de partículas e os físicos teóricos. Os processo nucleares no Sol som umha fonte continua de neutrinos, que escapam quase à velocidade da luz do núcleo solar e chega a terra unos oito minutos mais tarde... passando por ela e por nós sem que os notemos. Isto da umha ideia do "pantasmas" que som, aos protons criados nessas reaçons leva-lhes quase 1.000 anos escapar do núcleo... O problema é que empregando o modelo recohecido de dinâmica interna do Sol, e as teorias sobre os neutrinos, pode-se calcular que quantidade deles detectaremos na Terra... mais... os aparelhos so marcam entre 1/2 e um 1/3 do calculado. Desde finais dos 60 o "problema dos neutrinos solares" deu muito trabalho a muita gente. Considerou-se algum erro no modelo de funcionamento do Sol, no Modelo Padrom das Forças, problemas quânticos... de todo. A soluçom nom chegou até o 2002 quando umha serie de experimentos albiscarom que os neutrinos tinham umha massa, ínfima, ridícula miudiiiiissima... pero algumha tinham. Isto permite a existência dum fenómeno complicadíssimo chamado "oscilaçom neutrínica do sabor": Os neutrinos solares (neutrinos do electrom) podem mudar o seu sabor co tempo e ser neutrinos do muom o neutrinos da partícula tau... Euskera! Digo Eureka!: Por pura estatística o normal é que cheguem justo essas quantidades de neutrinos do electrom... problema amanhado!
Já sei que até aquí nom chegou ninguem, mais no filme há outro erro... pero como está visto que nom som quem de ser divulgativo (som consciente delo) deixo umha ligaçom a um dos melhores blogue sobre "erros científicos" no cine (e na literatura, e no "saber comum"): Malaciencia e o lume em gravidade zero.
chuzame -
January 20th, 2007 at 12:37 pm
E do cu de George Clooney non dis nada?
January 20th, 2007 at 12:42 pm
E non deixes de estudar cousas sobre o sol que en breve teremos este filme nas pantallas http://www.aintitcool.com/node/31275
January 20th, 2007 at 12:56 pm
Vós sempre vendo esas cousas que vos din os de Moscú
January 20th, 2007 at 2:59 pm
[...] Ifrit conta marabillosamente de que vai o filme. E fer dános a explicación científico-divulgativa. [...]
January 20th, 2007 at 9:42 pm
Eu quero un neutrino de chocolate!
January 20th, 2007 at 9:56 pm
Sinto, mais nom é o primeiro em fazer essa brincadeira Modesto