Posts tagged: SIDA

Magufismo na Galiza, hoje dous por um : Auriculoterapia e negacionismo da SIDA


Hoje ergui-me com umha nova entrada na magnífica La Lista de la Vergüenza que denúncia as universidades, colégios profissionais e similares que promocionam pseudociências médicas ao mesmo nível que a ciência médica real. Neste caso era um curso de “Auriculoterapia”, um calote derivado da acupunctura que afirma a existência de ligaçom entre determinados pontos da orelha com partes do corpo, e que as enfermidades podem ser tratadas aplicando pressom ou punçom sobre as partes equivalentes desse pequeno troço de cartilagem. A justificaçom é que essa parte do corpo “semelha um feto invertido”. Como era de esperar o curso enquadra-se no infame mestrado de acupunctura e moxibustom da USC dirigido polo irresponsável Jesus Bernardo Otero Costas com a cumplicidade da Faculdade de Medicina e a própria universidade.

Por sorte nom todo forom más notícias: O jornal Praza Pública fixo durante a manhã umha notícia mui bem redigida sobre as denúncias e o polémico mestrado. Surpreende essa excelente resposta jornalística, conhecendo o panorama acrítico com as pseudociências que existe em muitas publicaçons gerais.

A outra má notícia -neste caso já horrorosa- é que um Centro Social (eles indicam Okupado) de Compostela vai dar voz e espaço a umha das fraudes pseudocientíficas que mais mortos por negligência tem causado na história. Estou a falar de dar espaço e apresentar como um tema apropriado para o debate as posturas dos negacionistas da SIDA. O CSO “A Casa do Vento” vai realizar umha palestra-debate com o autoproclamado experto Manuel Garrido na que defende ideias tam afastadas de todo o conhecimento cientista como que nom existe ligaçom entre o vírus VIH e a SIDA, que o próprio vírus nom existe, que a SIDA nom é umha enfermidade mas um contendor de sintomas com muitas causas, que a SIDA é um projecto criado por umha baralha completa de organismos para outra baralha inteira de objectivos nefandos e toda classe de disparates semelhantes. Recomendo ler a entrada de The Skeptic’s Dictionary que ademais inclui umha excelente bibliografia, assim como todos os descobrimentos e achegas que há décadas eliminarom todas as afirmaçons dos movimentos negacionistas. Isso quando nom foi a própria enfermidade quem rematou com a vida dos staffs das publicaçons negacionistas como as da revista Continiuum.

O que vai acontecer na Casa do Vento nom entra dentro desses debates possíveis com crentes nas pseudociências que algumhas pessoas ceptistas aceitamos por diversom e divulgaçom. Estamos a falar dumha ideologia que é responsável de que pessoas ponham em sério perigo as suas vidas e saúde, expondo-se a contágios -pois a linha que nega a existência do próprio vírus resta importância ao uso do preservativo- ou que deixem de tomar os tratamentos reais conhecidos contra a síndrome. Estamos a falar de ideólogos que têm alimentado os delírios de governantes da África para que desatentam a pandemia nos seus países, fazendo acreditar a populaçom em remédios como dietas, tratamentos “alternativos” e demais irresponsabilidades. Som todas estas pessoas tam cúmplices das mortes da SIDA como os responsáveis da Igreja Católica, e agora as pessoas do Centro Social A Casa do Vento unem-se a essa lista de irresponsáveis.

Addendum: Seguindo o tópico dos HINVEZTIGADORÉ repararam em que os dous eventos magufos som publicitados com cartazes cheios de gralhas? A ver se as dam topado todas.

P.S.: Cá tedes umha recolhida de adesons contra o evento negacionista em Compostela.

O problema nom som os papas mas os “pradas”

I have as much authority as the Pope, I just don’t have as many people who believe it.
-George Carlin

Esta frase do genial humorista americano George Carlin, finado o ano passado, poderia ser umha boa contestaçom a este artigo – na sua linha evangelista, demencial e totalmente alheia à realidade- do escritor espanhol reconvertido em predicador Juan Manuel de Prada.

Na sua coluna no jornal espanholista ultraconservador ABC carrega contra aqueles que se atrevem a reprovar as últimas declaraçons irresponsáveis do sumo sacerdote católico contra o preservativo, as campanhas de educaçom sexual e contra umha experiência erótica aberta e sem prejuizos. Afirma que as palavras do Papa nom som criticáveis por simples políticos – e tampouco médicos , autoridades sanitárias, sexólogos, psicólogos, economistas, cientistas de muitos campos, trabalhadores sociais espertos no drama Africano, analistas internacionais, e umha longa lístagem- e que som emitidas desde umha possiçom de tal superioridade moral -no texto compara os “ataques” contra o pontífice com os que  supostamente sofreu um dos deuses principais do panteom cristiam- que a existência de qualquer crítica contra elas é umha “prova” da cercania da  fim do mundo que tanto gorentam os seguidores dessa religiom.

Cumpre lembrar que Juan Manuel de Prada é umha pena mercenária da Conferência Episcopal Espanhola, e tertuliano asíduo de debates a umha banda em canles golpistas. Um homem que em anteriores intervençons afirmou o seu posicionamento contra a Ciência, a igualdade de direitos independentemente da orientaçom sexual e o género, a separaçom da Igreja do estado e o evolucionismo. As suas palavras e artigos só podem ser interpretados como umha triste demonstraçom do que alguem pode chegar a escrever e defender por um plato de lentelhas quente.  Por isso nom paga muito o esforço de argumentar contra os seus despropósito.

Porém este artigo de Prada e as criminais palavras de Bento XVI servem para termos presente um feito terrível: Nom importam os esforços das pessoas comprometidas com o desenvolvimento do continente africano ou com a difussom dumha sexualidade que nom tenha como alicerces o medo e o ódio para o próprio corpo,  nom importam os trabalhos de cientistas, médicos e educadores, nom importam as razons, argumentos e provas acumuladas, sequer os dados puros e a vista de todos (o sucesso das campanhas de educaçom sexual nom chumbadas pola moral católica, como o caso de Uganda)… nada disso importa quando centos de milhons de pessoas (e de líderes políticos e económicos) acreditam mais nas palavras dum velho idoso que supostamente escolheu o celibato -e nom como umha escolha sexual voluntária e sana, mas como um jeito de inmolaçom para os seus deuses- e desconhece o que é umha vida sexual activa, um homem cuja única formaçom “superior” versa sobre fantasias de aladas criatura invisíveis, animais que falam e ascetas com poderes mágicos -e das suas complexas interrelaçons- e que supostamente acredita que um espíritu mágico besbelha segredos infalíveis na sua orelha quando escreve sobre estes temas.

Assim que nom importa que desde o Iluminismo nós  -a gente racional, científica, que procura argumentos reais- a escuridade da religiom esteja acurralada e sem armas no plano das ideias, quando no mundo físico existirem pessoas como esse Prada -e tantos outros pasivos- que nom tenhem esses valores como criterio para escolherem a quem seguir.